ზედსართავი სახელის პარადიგმები

ზედსართავთა ბრუნების ამ ტიპში შედიოდა რამდენიმე ზედსართავი (მაგ. anahaimeis, anahaims (სახლში მყოფი); რაიმეს დამსწრე); auþeis, auþs (უდაბური); aljakuns (უცხო, უცხოელი)) რომლებიც თავდაპირველად -i- ტიპს განეკუთვნებოდა, მაგრამ დროთა განმავლობაში მათი ბრუნვითი ფორმების უდიდესი ნაწილი ბრუნების -ja- (-jo-) ტიპში გადავიდა.

მიმღეობა I (ანუ აწმყო დროის მიმღეობა) გოთურში აღნიშნავდა:

(ა) შემასმენლის მიერ გამოხატული მოქმედების ან მდგომარეობის ერთდროულად მიმდინარე პროცესს. მაგ. þamma bidjandin þuk gibais „მთხოვნელს მიეცი“ (მათ. 5:42); þanuh atberun du imma usliþan ana ligra ligandan „მაშინ მიუყვანეს მას ლოგინზე მწოლიარე დამბლადაცემული“ (მათ. 9:2); Iesus [...] gasaƕ mannan sitandan at motai „იესომ დაინახა საბაჟოსთან მჯდომარე კაცი“ (მათ. 9:9); iþ þai mans sildaleikidedun qiþandans „ადამიანებს კი უკვირდათ და ამბობდნენ“ (მათ. 8:27) და ა.შ.

(ბ) ამავე დროს, მიმღეობა I. გოთურში ხშირად აღნიშნავდა შემასმენლის მიერ გამოხატული მოქმედების ან მდგომარეობის წინმსწრებ პროცესს. მაგ. – dalaþ þan atgaggandin imma af fairgunja, laistidedun afar imma iumjons managos „როდესაც ჩამოვიდა მთიდან, თან გაჰყვა დიდძალი ხალხი“ (მათ. 8:1); jah urreisands galaiþ in gard seinana „ისიც მაშინვე აღდგა (წამოდგა) და წავიდა თავის სახლში“ (მათ. 9:7); jah duatgaggandans siponjos is urraisidedun ina „მივიდნენ მისი მოწაფეები (და) გააღვიძეს“ (მათ. 8:25); gasaihvands þan Iesu jah ufhropjands draus du imma „იესო რომ დაინახა, შეჰყვირა (და) მის წინაშე დაემხო“ (ლუკ. 8:28).

ამგვარ კონსტრუქციებში გოთური მიმღეობა I-ის სინტაქსურ-სემანტიკური ფუნქცია ხშირად საკმაოდ ჰგავს რუსული აბსოლუტივის (деепричастие) ხმარებას. ამდენად, ზემომოყვანილ ციტატებში გოთური მიმღეობა I.-ის შემცველი კონსტრუქციები ქართულად შეიძლება ითარგმნოს როგორც დამოკიდებული წინადადებებით („(უკვირდათ) და ამბობდნენ“, „როდესაც ჩამოვიდა“, „ისიც [...] წამოდგა და“; „რომ დაინახა“ და ა.შ.), ასევე მიმღეობით, ან შესაბამისი ზმნის პირიანი ფორმისთვის „რა“ კავშირის დართვით: sildaleikidedun qiþandans – „გაოცდნენ (ამ სიტყვების) მთქმელნი“ ან „ამბობდნენ რა“; dalaþ þan atgaggandin imma af fairgunja – „მთიდან ჩამომავალს / ჩამოსულს“ ან „ჩამოდიოდა რა მთიდან“; gasaihvands – „დამნახავი, დამნახავმა“ ან „დაინახა რა“; ufhropjands – „მყვირალი“ ან „დაიყვირა / შეჰყვირა რა“; duatgaggandans – „მიმავალმა, მისულებმა“ ან „მივიდნენ რა“; urreisands – „წამომდგარი, წამომდგარმა“ ან „წამოდგა რა“ და ა.შ.